Ndërsa dje zhvilloheshin homazhet e fundit për Jesús de Miguel, futbollistin e Tenerifes që humbi jetën pasi u godit fuqishëm me gju në kraharor gjatë një ndeshjeje të kategorisë së dytë spanjolle, autori i ndërhyrjes që i shkaktoi vdekjen vijon të qëndrojë i mbyllur në shtëpinë e tij në Andorra, ashtu siç është mbyllur edhe shpirti i tij në një dhimbje të pafundme. Jesús Owono është një njeri “i shkatërruar”, kështu e përshkruajnë ata që e kanë parë gjatë orëve të fundit. Portieri 25-vjeçar ndodhet ende në gjendje shoku emocional dhe nuk është në gjendje ta përvetësojë tragjedinë. Një burim i afërt, i cituar nga “The Athletic”, shpjegon se Owono “është i izoluar nga bota, në këtë moment nuk e di as vetë se kush është”.
Futbollisti i përfaqësueses së Guinesë duhet të përballet me një peshë të jashtëzakonshme, të papërballueshme: atë të një jete njerëzore që nuk ekziston më. Dhe, pavarësisht se të gjithë vazhdojnë t'i përsërisin se nuk është fajtor, ai e ndien të gjithë atë faj mbi vete dhe kush e di edhe për sa kohë do të vazhdojë të jetë kështu. Ndoshta nuk do t'i mjaftojë as një jetë. Owono nuk është vetëm në këtë moment të tmerrshëm – “ditët më të vështira të jetës sime”, shkroi ai në të vetmin reagim që ka bërë deri tani – pasi në shtëpinë e tij është e vazhdueshme prania e njerëzve që e duan dhe nuk e lënë asnjë çast vetëm, nga familjarët deri te miqtë më të afërt.
Jesús Owono i mbyllur në shtëpi, nuk lihet vetëm asnjë minutë
Që kur skuadra e Andorras është kthyer në kryeqytetin e Principatës, portieri nuk ka dalë më nga banesa. Nëna e tij është shtylla që e mban në këmbë, e ndihmuar fillimisht nga partnerja e tij dhe nga disa miq futbollistë, të cilët kanë nxituar për t'i qëndruar pranë. Ish-shokët e skuadrës, por edhe agjentët e tij, që kanë menaxhuar të gjithë karrierën e tij, ndodhen në Andorra, në krah të tij që prej të martës së kaluar, ditës së tragjedisë.
Edhe klubi i tij aktual, ku u transferua vitin e kaluar, është bashkuar rreth tij, duke nisur nga Gerard Piqué, aksioneri kryesor i klubit, i cili i ka garantuar të gjithë mbështetjen e nevojshme. Më pas janë shokët e skuadrës, trajnerët dhe stafi, të gjithë po japin kontributin e tyre për ta nxjerrë Owono nga humnera ku ka rënë.
Çfarë po ndodh me portierin?
Ai nuk pushon së qari, nuk gjen qetësi. Është pa celular dhe plotësisht i shkëputur nga rrjetet sociale, për të shmangur fyerjet, kërcënimet – edhe ato raciste – dhe mesazhet e urrejtjes që ka marrë. Ai e ka mbyllur profilin e tij në Instagram. “Nuk do t'i bënte kurrë keq askujt”, komentoi njëri prej kapitenëve të skuadrës. Edhe tifozët e Andorras i kanë dorëzuar një letër mbështetjeje: “Nuk je vetëm, këtu është shtëpia jote”.
Nga ana tjetër, e gjithë skuadra është tronditur nga ajo që ndodhi para syve të tyre. Të dëshmosh vdekjen e një kolegu në fushë ka qenë shkatërruese dhe edhe ata kanë nevojë për mbështetje psikologjike. I gjithë komuniteti i Andorras është bashkuar në dhimbje dhe respekt. Për atë që nuk është më mes nesh, por edhe për atë që po përpëlitet nga ndjenja e fajit.
