Pavarësisht se Juventus ishte në avantazh me dy gola dhe e kishte plotësisht nën kontroll ndeshjen me AZ Alkmaar, Luciano Spalletti vazhdonte të zemërohej me lojtarët e tij në stol. Imagjinoni se çfarë ndodhi në minutat e fundit, kur holandezët ngushtuan diferencën, duke rrezikuar të komprometonin fitoren bardhezi. Trajneri ishte transformuar plotësisht, ndërsa Cabal e kërcënoi duke i vendosur grushtin pranë fytyrës. Një reagim që erdhi nga rreziku për të zhvlerësuar një fitore plotësisht të merituar. Dhe, përtej reagimit të fortë, ai nuk ishte aspak pa të drejtë në lidhje me qëndrimin taktik të mbrojtësit të krahut.
Spalletti ishte i papërmbajtshëm ndaj mbrojtësit kolumbian, veçanërisht për mënyrën se si mbrojti në rastin e golit të AZ Alkmaar. Numri 32 i Juventusit nuk e lexoi aksionin dhe humbi kundërshtarin, i cili më pas bëri depërtimin që solli golin. Pak më vonë, kur Cabal shkoi në stol, trajneri u zemërua, duke i drejtuar grushtin, shtrënguar dhëmbët dhe duke iu afruar në mënyrë kërcënuese. Spalletti e ftoi lojtarin, në mënyrën e tij, të ishte më i vëmendshëm dhe të mos përsëriste të njëjtin gabim, duke i thënë: “Do të të jap një grusht”. Më e qartë se kaq, vështirë të bëhet. Cabal u duk në vështirësi dhe provoi me ndrojtje të kërkonte shpjegime të mëtejshme për lëvizjen e tij.
Spalletti i tërbuar me Cabal
Pas ndeshjes, trajneri preferoi të mos ndalej te futbollistët veçmas, as për mirë dhe as për keq. Megjithatë, diçka deshi ta thoshte, duke u përqendruar veçanërisht te gabimet e kryera, të cilat për pak sa nuk e zhvlerësuan paraqitjen e shkëlqyer të Juventusit, që ndërpreu një seri prej 17 ndeshjesh radhazi pa humbje në shtëpi në Europë për AZ-në.
Spalletti dha mesazhet e duhura: “Cila është gjëja që më bind më pak te Juventusi? Më bind kur i shoh të kenë qëndrimin e duhur. Ajo që më shqetëson është kur pësohet një gol dhe më pas: ‘Po pse nuk vjen ky tjetri?’. Ose: ‘Unë e kam marrë përsipër këtë lojtar, por cili është i imi? Ky është i yti, ky është i imi’. Dhe pastaj kundërshtarët lëvizin, gjejnë hapësirën, të çajnë me topin pas shpinës tënde dhe pëson gol për shkak të një vendimi që nuk është marrë. Vendimet që nuk merren janë më të këqija se ato të gabuara, sepse nëse ti vendos, vendos gabim dhe bën një veprim të gabuar, kostoja është më e vogël se ajo e një vendimi që nuk merret. Ai që nuk merret është më i keqi nga të gjitha vendimet”.
Cabal herën tjetër mund të gabojë sërish, por e rëndësishme do të jetë të mos hezitojë, ashtu siç bëri në aksionin që rrezikoi seriozisht ta rihapte ndeshjen.
