Një ndeshje futbolli për të rinj u shndërrua në një betejë të vërtetë, duke vendosur një rekord që pritet të shkaktojë shumë diskutime. Në Brazil, gjysmëfinalja e Divizionit të Dytë të kampionatit Under 20 të Minas Gerais, mes Uberlândias dhe Mamoré, u karakterizua nga një sherr masiv që çoi në përjashtimin e 53 personave, mes futbollistëve, pjesëtarëve të stafeve teknike dhe drejtuesve të dy klubeve.
Ndeshja, e zhvilluar në Parque do Sabiá, doli jashtë kontrollit në fundin e saj, kur tensioni i grumbulluar gjatë takimit shpërtheu në një përleshje të dhunshme. Bilanci i përgjithshëm është i jashtëzakonshëm: 43 futbollistë, tetë pjesëtarë të stafeve teknike dhe dy drejtues morën kartonin e kuq. Plot 50 nga 53 përjashtimet erdhën pikërisht si pasojë e sherrit që shpërtheu në minutat shtesë.
CENAS LAMENTÁVEIS😥 Confusão generalizada entre os elencos de Uberlândia X Mamoré pela semifinal da segunda divisão do mineiro sub-20. Jogo terminou após uma longa briga entre as equipes. 🎥 YouTube/Bola e Batom https://t.co/FihSKdGYlF
— Mineiro Módulo 2🔺 (@mineiromodulo2) November 2, 2026
Shkëndija pas golit të Mamoré
Ndeshja kishte qenë veçanërisht e tensionuar që në fillim. Para incidentit vendimtar, arbitri Fernando Patrick kishte nxjerrë edhe katër kartonë të tjerë të kuq, nga dy për secilën skuadër. Mes arsyeve për këto përjashtime të mëparshme ishin sjelljet e dhunshme, grushtet, mungesa e respektit dhe ndërhyrjet ndaj kundërshtarëve. Situata doli përfundimisht jashtë kontrollit pas golit të Mamoré, i shënuar në minutën e 54’ të pjesës së dytë, që vulosi rezultatin përfundimtar 3-1. Gjatë festimit, Davi Bittencourt dyshohet se bëri gjeste provokuese në drejtim të stolit të Uberlândias, duke i shoqëruar ato me fyerje dhe shprehje ofenduese.
Kjo sjellje shkaktoi reagimin e kundërshtarëve. Brenda pak çastesh, disa futbollistë braktisën pozicionet e tyre për t'u përfshirë në një përleshje masive, ku u bashkuan edhe pjesëtarë të stafeve teknike dhe drejtues të klubeve. Situata doli shumë shpejt jashtë kontrollit, duke e kthyer fushën në një arenë goditjesh me shqelma, grushtesh dhe sulmesh.
Sipas raportit të arbitrit, 39 futbollistë të tjerë u përjashtuan për përfshirjen në përleshje. Kështu, numri i përgjithshëm i lojtarëve të ndëshkuar me karton të kuq shkoi në 43. Vetëm dy prej tyre, Luike Bispo dos Santos dhe Roberto Domingos dos Santos, arritën t'i shpëtonin përjashtimit.
Rekordi i ri botëror
Pasojat nuk u kufizuan vetëm te futbollistët. Edhe trajnerët dhe disa pjesëtarë të stafeve teknike përfunduan në raportin e arbitrit, së bashku me dy drejtues klubesh. Arbitri sqaroi se, për shkak të kaosit, nuk kishte pasur mundësi fizike t'ua tregonte kartonin e kuq të gjithë personave përgjegjës gjatë përleshjes. Për këtë arsye, përjashtimet u regjistruan më vonë në raportin zyrtar të ndeshjes. Ngjarja vendosi një rekord të jashtëzakonshëm për numrin e personave të përjashtuar në një ndeshje të vetme, duke tejkaluar ndjeshëm shifrën e mëparshme historike. Në shkurt të vitit 2011, derbi i kategorisë së pestë në Argjentinë mes Atlético Claypole dhe Victoriano Arenas kishte përfunduar me 36 futbollistë të përjashtuar.
O jogo entre Uberlândia e Mamoré, no Mineiro sub-20, QUEBROU O RECORDE MUNDIAL de expulsões. 51 expulsos. 48 pela briga generalizada. 3 com a bola rolando. O recorde até então havia acontecido na 5ª divisão argentina, quando 36 pessoas foram expulsas.
— Maurício Mendes (@mauriciojornal_) November 4, 2026
Rasti në Brazil ka kaluar një kufi që dukej pothuajse i paarritshëm. Bëhet fjalë për rekordin e ri botëror të përjashtimeve, por mbetet për t'u parë nëse ai do të njihet zyrtarisht nga Libri i Rekordeve Guinness. Ngjarja mund të sjellë edhe pasoja të tjera në aspektin disiplinor dhe gjyqësor, pasi policia mund të nisë verifikimet për dhunën e shpërthyer gjatë ndeshjes. Një gjysmëfinale Under 20, e cila duhej të mbahej mend për rezultatin sportiv, u shndërrua kështu në një nga episodet më të pabesueshme dhe më të pakëndshme në historinë e futbollit: 53 përjashtime dhe një sherr masiv ku u përfshinë thuajse të gjithë protagonistët e takimit.
