Benjamin Netanyahu përballet me një nga sfidat më të mëdha politike të viteve të fundit, pasi rivali i tij Gadi Eisenkot pritet të marrë mandatin për formimin e qeverisë së re. Presidenti Isaac Herzog do t’ia dorëzojë zyrtarisht mandatin të dielën, pasi Eisenkot siguroi mbështetjen e 67 prej 120 deputetëve të Knessetit, kundrejt 46 që mbështetën Netanyahun.
Megjithatë, krijimi i një koalicioni mbetet i ndërlikuar. Eisenkot, ish-shef i ushtrisë izraelite dhe drejtues i partisë Yashar, synon të formojë një qeveri emergjence me katër partitë kryesore të opozitës hebraike, të mbështetur në Parlament edhe nga partitë arabe. Pikërisht këtu qëndron pengesa kryesore. Avigdor Liberman, kreu i Yisrael Beiteinu, ka përjashtuar një qeveri që do të varej nga votat e partive arabe. Ai propozon në vend të tyre përfshirjen e partive ultraortodokse Shas dhe United Torah Judaism.
Por edhe ky skenar ka vështirësi, pasi partitë ultraortodokse kundërshtojnë shërbimin e detyrueshëm ushtarak për burrat e komunitetit të tyre, ndërsa opozita e ka vendosur barazinë në shërbimin ushtarak mes prioriteteve të saj. Netanyahu, ndërkohë, po përpiqet të pengojë krijimin e një shumice alternative. Ai ka kërkuar formimin e një qeverie të unitetit kombëtar nën drejtimin e Likud-it dhe ka kundërshtuar një kabinet që do të mbështetej nga partitë arabe. Eisenkot e ka refuzuar këtë propozim dhe i ka kërkuar Likud-it të shkëputet nga aleatët e ekstremit të djathtë dhe t’i bashkohet një qeverie të drejtuar prej tij.
Testi i parë për shumicën e re pritet të jetë zgjedhja e drejtuesit të Knessetit, ku opozita synon të zëvendësojë kryetarin aktual, aleat të Netanyahut. Pas marrjes së mandatit, Eisenkot do të ketë 28 ditë për të formuar qeverinë, me mundësi zgjatjeje edhe për 14 ditë të tjera.
Nëse negociatat dështojnë, mandati mund t’i kalojë një kandidati tjetër, ndërsa Netanyahu do të vijojë të qëndrojë në detyrë deri në krijimin e një qeverie të re. Eisenkot e ka cilësuar situatën si një “emergjencë kombëtare”, duke argumentuar se Netanyahu nuk duhet të vazhdojë të qeverisë pasi nuk gëzon më shumicën parlamentare.
