Shtyhet seanca gjyqësore e Ervin Salianjit për çështjen 'Babale'. Arsye për shtyrjen ka qenë kërkesa e bërë nga përfaqesuesi ligjor i Jetimir Olldashit, Indrit Sefa, për përjashtimin e gjyqtares Iliba Bezati. Seanca e radhës do të mbahet me datë 24 prill në orën 10:00. Ndërkohë, në një prononcim për mediat, Salianji pasi doli nga gjykata tha:
“Është një çështje që ka ardhur në Apel ashtu si në shkallën e parë si kallëzim i trafikantit të drogës Agron Xhafaj. Ne kemi prova shkencore sesi është 100 përqind i vërtetë denoncimi dhe se si institucionet e shtetit shqiptar kanë shmangur hetimin për trafikun e drogës ndaj vetë ministrit dhe Geron Xhafës në bazë të antimafias për t’i bërë të mundur të vazhdojë karrierën politike.
Do të kemi gjithë kohën e mjaftueshme dhe detajet në seancën e datës 24. Nuk jam marrë asnjëherë me sulme personale ndaj gjykatës apo gjyqtarëve pavarësisht se të gjithë gjyqtarët dhe prokurorët që kanë marrë vendimarrje në gjykatën e shkallës së parë janë shkarkuar nga vettingu. Gjyqtari që ka marrë vendimin e shkallës së parë Artan Gjermeni është në përgjimet e Italisë që ishte shërbëtor i fëlliqur dhe i pjesës tjetër të bandës së Lushnjes që quhej i vogli. Është rasti i parë që një deputet gjykohet nga një gjykatë e juridiksionit të përgjithshëm dhe jo nga SPAK për shkak se është një situatë surreale.“, tha Salianji.
