Sikur të mos mjaftonte një fillim i komplikuar i sezonit, Max Allegri e gjen veten duke numëruar lojtarët në dispozicion për sfidën kundër një Napoli i cili, së bashku me 4 ekipe të tjera, është 5 pikë në renditje përpara Juventusit. Problemi i madh vjen nga amerikano-jugorët: Alex Sandro, Bentancur, Cuadrado, Danilo dhe Dybala do të mbërrijnë në Itali disa orë para ndeshjes në Maradona dhe do të ishte vërtetë me rrezik për t’i hedhur në fushë, duke pasur parasysh se të martën është debutimi në Ligën e Kampionëve kundër Malmoes në Suedi.
Dybala pritet të luajë, në orët e para të së premtes, kundër Bolivisë (1.30 me orën tonë), Bentancur, i cili pësoi një dëmtim të lehtë por duhet të rikuperojë, mund të jetë në fushë në Uruguay-Ekuador (në orën 00.30), brazilianët Danilo dhe Alex Sandro do të luajnë në 2.30 kundër Perusë, ndërsa Cuadrado do të jetë protagonist në Kolumbi-Kili (1.00). Është e vështirë të imagjinohet se, pas një fluturimi ndërkontinental, ata mund të jenë në fushë pas disa orësh, në orën 18 të shtunën. Problemit të lidhur me amerikano-jugorët i shtohet ai i dëmtimit të Federico Chiesas, i cili do të kursehet nga angazhimi me kombëtaren kundër Lituanisë dhe është larguar nga grumbullimi i të kaltërve.
Allegri do të takojë përsëri grupin e lojtarëve të Italisë, që vijnë nga angazhimi i trefishtë në kualifikueset në Katar 2022, vetëm nesër (ashtu si dhe të tjerët që luajnë me kombëtaret e tyre: Szczesny, Kulusevski dhe Morata), ndërsa sot kthehen de Ligt dhe Rabiot, pas ndeshjeve me Holandën dhe Francën. Për fat të mirë për Allegrin, naiviteti i McKennie, i përjashtuar nga grumbullimi për shkak të mos përdorimit të maskës, i lejoi mesfushorit amerikan të bashkohej paraprakisht me grupin e kufizuar të Juventusit. Sigurisht, megjithatë, është shumë komplekse, me këto premisa, të përgatitësh një ndeshje kaq të komplikuar si ajo kundër skuadrës së Spallettit.
