“Iu thashë lojtarëve që sot i kemi të gjitha mundësitë që të marrim 3 pikët, se Skënderbeu është si “gastare”, në momentin që do ta godasim do të thyhet, duke qenë së nuk ka pike”. Trajneri i Kastriotit, Ramadan Ndreu, e ka komentuar kështu fitoren me Skënderbeun, pa dashur ti fyejë kundërshtarët. Ndoshta në moment euforie, pas triumfit në transfertë, që i jep siguri absolute skuadrës krutane për sa i përket mbijetesës, tekniku i krutanëve vazhdoi: “E kisha menduar që do të ishte ndeshje e vështirë. Për Skënderbeun do të ishte finale dhe do të ishte një ndeshje agresive ku do të jepnim maksimumin. Presuam lartë, e merituam fitoren, jam i kënaqur. Gjatë gjithë 90 minutëshit skuadra e Skënderbeut nuk ka bërë asnjë manovër të rrezikshme. E kemi interpretuar mjaft mirë ndeshjen, jam i kënaqur”.
Tekniku i Kastriotit ka treguar me detaje cfarë nuk ka shkuar në këtë muaj për skuadrën e tij, që ka humbur shumë nga agresiviteti që e karakterizon: “Për mua është shumë e çuditshme. Kemi pasur disa luhatje. Menduam që në janar të afronim lojtarë, por nuk gjetëm lojtarë mbi nivelin e atyre që kishim. 3-4 lojtarë na ikën. Husein, Bojom, Plaku. Edhe me lojtarë të tjerë të dëmtuar, patëm luhatje në disa ndeshje të veçanta. Akoma nuk e kemi luksin apo kapacitetin për të përballuar 3 ndeshje në javë” – sqaroi tekniku krutan që bëri edhe një premtim – “Unë ju premtoj që do të jemi në të gjitha ndeshjet të karikuar. Duhet skuadër e plotë. Do të vazhdojmë deri në fund luftën për t’i dhënë deri në fund bukurinë kampionatit”.
