Teuta është në vendin e pestë me 13 pikë, në shoqërinë e Tiranës, Partizanit e Kastriotit e për këtë arsye durrsakët e kanë të qartë se gabimet rrezikojnë ta zbresin edhe më shumë në renditje, duke e bërë të largohet nga objektivi titull. Fitorja minimale kundër Apolonisë, nuk tregoi asgjë nga ajo që priste tekniku Edi Martini nga të tijtë, por që i ka dhënë mundësinë Teutës të shkojë më e qetë në transfertën me Skëndërbeun. Rasti i Krasniqit i humbur përballë Apolonisë është ende i fiksuar në mendjen e teknikut, që nuk po arrin të gjejë celësin për të bërë të funksionojë ofensiva e skuadrës së tij: “Besoj se gjithë ekipi do të zhbllokohet. Normalisht edhe sulmuesit do e lirohen dhe do të shënojnë gola. Kanë pasur një moment jo të mirë përpara portës, pavarësisht se kanë bërë ndeshje shumë të mira gjatë 90 minutave, por ashtu si portieri kur pëson një gol është në presion, ashtu janë edhe sulmuesit kur nuk shënojnë.”
Teuta deri tani është sulmi më i keq i kampionatit me 5 gola të shënuar në 9 ndeshje, aq sa Bylis e Apolonia, gjë që Martini shpreson ta ndryshojë në Korcë, edhe mungesa e Aleksit i ka prishur disi planet e teknikut, por jo sa për ta bërë të fshihet pas justifikimeve. Teuta ka nevojë për pikë, për tu kthyer në shinat e pretendimeve e duhet ta bëjë në transfertën e Korcës.
