Kreu i PD-së, Lulzim Basha, u shpreh se zgjidhja për naftëtarët e Ballshit dhe për familjet e tyre është plotësisht e realizueshme. Sipas tij, duhet një kryeministër dhe një qeveri që nuk është pjesë e aferave korruptive që të zgjidhë çështjen e tyre.
Ai gjithashtu parashtroi edhe tre pikat për zgjidhjen e problemit të naftëtarëve.
“Unë i qëndroj fjalë për fjalë asaj që kam thënë gjatë takimit me naftëtarët në grevë urie. Sikurse e thanë qartë, ata nuk presin më zgjidhje. Janë gënjyer, janë mashtruar vazhdimisht nga Edi Rama dhe partnerët e tij në këtë zhvatje. Po të shikoni një material të publikuar nga zoti Alibeaj sot, do shikoni se çfarë thotë për naftëtarët para dy vjetësh me atë që thotë, do shikoni se Rama është i përfshirë kokë e këmbën në aferat që kanë të bëjnë me rafinerinë. Zgjidhja e këtij problemi është plotësisht e realizueshme por kërkon një kryeministër dhe qeveri e cila nuk është pjesë e aferave korruptive. Naftëtarët e Ballshit, familjet e tyre, e gjithë zona e Patos-Marinzës, qytetarët e Fierit do të kenë dorë të vendosin më 25 prill.
Për ne prioritetet janë të qarta, heqja me urgjencë e taksës Rama mbi karburantin 240 l/litër, kontrolli rigoroz i cilësisë së karburantit dhe rikthimi në arkën e shtetit e një shume prej të paktën 50 milionë eurosh në vit e evazionit që i bëhet arkës së shqiptarëve nga ky sektor. Kështu do arrihet që dhe uzina të vihet në punë dhe nafta të prodhojë mirëqenie për fierakët dhe të gjithë qytetarët”, deklaroi Basha.
