Policia Kufitare e Kakavijës i ka sekuestruar 25 mijë euro një çifti resident në Greqi. 43 vjeçarja me inicialet S.R i mbante të fshehura në çantën e saj dhe nuk i kishte deklaruar. Shuma e parave u sekuestrua në cilësinë e provës material dhe 43 vjeçarja po hetohet penalisht në gjëndje të lirë.
KAKAVIJË
Policia Kufitare e Kakavijës ka zbuluar një tjetër rast të mosdeklarimit të të hollave në kufi duke sekuestruar 25 500 euro dhe proceduar penalisht një 43-vjeçare.
Shërbimet e Policisë Kufitare në Kakavijë, si rezultat i shtimit të kontrolleve me qëllim parandalimin dhe goditjen e paligjshmërisë, si dhe bazuar në analizën e riskut, në dalje të RSH-së, kaluan për kontroll në vijën e dytë, shtetasen S. R., 43 vjeçe, lindur në Himarë dhe rezidente në Greqi, e cila udhëtonte me automjet së bashku me bashkëshortin e saj. Gjatë kontrollit të ushtruar në automjet, shërbimet e Policisë Kufitare, në bashkëpunim me shërbimet doganore, gjetën të fshehura në çantën e shtetases S. R., 25 500 euro, të cilat shtetasja e mësipërme nuk i kishte deklaruar. Shuma e parave u sekuestrua në cilësinë e provës materiale.
Në përfundim të veprimeve të para të kryera nga specialistët e Seksionit të Hetimit të Krimit Ekonomik e Financiar në DVP Gjirokastër, u procedua penalisht në gjendje të lirë shtetasja S. R., për veprat penale “Mosdeklarimi i të hollave dhe sendeve me vlerë në kufi” dhe “Pastrimi i produkteve të veprës penale ose veprimtarisë kriminale”.
