Kryeministri Rama ka folur për deklaratat fyese të ministrit të mbrojtjes së Serbisë, Aleksandër Vulin. Gjatë konferencës "Ekonomia", Rama tha se Ministria e Jashtme ka përgatitur një notë proteste për deklaratat e ministrit serb, duke mos nguruar t’i vërë epitetin fatkeqësi natyrore këtij të fundit.
“Për sa i përket fatkeqësisë natyrore që zbulova se ndodhet në qeverinë e Serbisë, në trajtën e një ministri, unë them se vazhdoj pres që presidenti i Serbisë të kërkojë në emër të Republikës së Serbisë, ndjesë për atë fatkeqësi natyrore. E mirëkuptoj që mund të mos ketë fuqi mbi atë fatkeqësi por ta mbajë për vete dhe Serbinë. MPEJ ka vijuar me procesin dhe ambasadori do të thirret për t’i bërë notë verbale, vënien në dijeni të shtetit serb, se asnjë gojë e shthurur në qeverinë e Serbisë, nuk mund të lëndojë qeverinë e Serbisë, apo figurën e një ministri apo kryeministri”, ka thënë Rama.
Ministri serb, Vulin u shpreh se Ramës i pëlqen të flas për pajtimin e shqiptarëve me serbët, por ndërkohë pajtimi nënkupton ndëshkim të serbëve, dhe angazhim për krijimin e Shqipërisë së Madhe.
