Autoritetet meksikane publikuan pamjet e tentativës së pak ditëve më parë, për të arrestuar djalin e bosit meksikan të drogës El Çapo. Por presidenti justifikoi policinë që tërhoq, pasi sipas tij zonën e rrethuan anëtarët e armatosur të kartelit të Sinaloas.
Autoritetet meksikane publikuan këtë video, që tregon momentet kur efektivë të policisë ushtarake ndërhyjnë në një banesë për të arrestuar Ovidio Guzmanin, djalin e El Çapos, kreut të kartelit famëkeq të dogës të Sinaloas.
Xhirimet janë kryer me një kamerë trupi që e mbante drejtuesi i operacionit, i cili u bën thirrje vazhdimisht të qëndrojnë të qetë, njerëzve të Guzmanit që e shoqërojnë të shqetësuar.
Operacioni mban datën 17 tetor, por policia ushtarake nuk arriti ta finalizojë. Ata u detyruan t’a lënë të lirë, pasi zonën e rrethuan qindra pjesëtarë të armatosur të karteleve të tij. Në video, dëgjohen në sfond të shtënat me armë prej tyre.
I vënë përballë kritikave nga opinioni publik, presidenti meksikan justifikoi vendimin për lirimin e tij.
"Vepruam në mënyrën më të drejtë, për të shpëtuar jetët e të tjerëve. Do të duheshin deri 3 mijë forca në atë moment, mitralozë, helikopterë për të ndërhyrë. Për më tepër, na kërcënuan se do të vrisnin civilë si hakmarrje" - tha ai.
I zgjedhur president një vit më parë, Lopez Obrador i ka shpallur luftë karteleve të drogës, por që deri më tani ka dështuar në uljen statistikave të vrasjeve.
