Drejtori i Përgjithshëm i Doganave, Arlind Gjokutaj, ka dhënë dorëheqjen vetëm 7 muaj pasi mari detyrën.
Mësohet se në vend të Gjokutajt është caktuar të emërohet Gjon Bardhi, i cili deri më tani mbante postin e nëndrejtorit të këtij institucioni.
Nuk dihen ende arsyet e dorëheqjes së Gjokutajt, por mendohet se largimi i tij është i motivuar nga të dhënat e 9 mujorit të vitit 2019 për treguesit fiskalë, publikuar nga Ministria e Financave, ku rezulton se ka një mosrealizim prej 4% të planit të Doganave, që përkthehet në një vlerë prej gati 5 miliardë lekësh.
Largimi i Gjokutajt vjen në një kohë kur Policia e Shtetit ka nisur një sërë operacionesh kontrolli në portet dhe doganat e vendit. Jo më larg se dy ditë më parë, 200 policë mësynë në ambientet e Doganës së Tiranës, nga ku u shoqëruan 7 persona, mes tyre edhe punonjës të pikës së kontrollit. ©Lapsi.al
