Komisioni i posaçëm parlamentar për Reformën Zgjedhore do të mblidhet mëngjesin e kësaj të enjteje, për të konstituar tre grupet e punës të ngritura për t’u dhënë përgjigje prioriteteve të palëve të përfshira në këtë proces.
Grupi i punës nga Partia Socialiste përbëhet nga deputetët Damian Gjiknuri dhe Bashkim Fino, ndërsa nga radhët e opozitës parlamentare është zgjedhur Myslim Murrizi dhe Nimet Musaj. Lidhur me çështjet që kanë të bëjnë me financimin e partive politike në zgjedhje, grupi punës socialist përbëhet nga deputetja Blerina Gjylameti dhe Klotilda Ferhati, si edhe nga opozitarët Arben Elezi dhe Ralf Gjoni. Ndërkaq, grupi i tretë i cili do diskutojë mbi një ndër prioritetet e mazhorancës, atë të garantimit të votës së emigrantëve, do përbëhet nga Alket Hyseni dhe Adnor Shameti nga PS dhe Korab Lita e Adriatik Alimadhi të minorancës.
Ditët e fundit, kryeminitri Edi Rama ka deklaruar se miratimi i Reformës Zgjedhore do të kalojë në dy faza. Në të parën, e cila synohet të miratohet brenda muajit dhjetor të këtij viti, bëjnë pjesë ndryshimet ligjore, bazuar në rekomandimet e OSBE/ODIHR në tre zgjedhjet e fundit. Ndërkohë, në fazën e dytë do të diskutohen çështje që kanë më tepër peshë politike, si: vota e emigratëve, mundësia për rishikimin e sistemit zgjedhor dhe aplikimi i teknologjisë në zgjedhje.
Realizimi i Reformës Zgjedhore ishte një nga kushtet imediate të vendosura për t'u përmbushur nga Bundestagu gjerman në këmbim të dhënies së pëlqimit të kushtëzuar për çeljen e negociatave të anëtarësimit me Shqipërinë, që u shtynë sërish, si rezultat i mungesës së unanimitet në Këshillin Evropian, kryesisht nga oponenca e fortë e Francës, Holandës dhe Danimarkës.
