Ariedo Braida i deklaron "luftë" Barcelonës. Sipas asaj që bën të ditur As, ish-drejtuesi blaugrana ka vendosur të kundërshtojë shkarkimin e tij, duke vepruar përmes rrugëve ligjore. Fillimisht i menduar për të zgjatur edhe tre vjet të tjerë, raporti mes Braida e Barça u ndërpre ashpërsisht nga klubi në muajin gusht. Një lamtumirë e hidhur, që tani rrezikon të përfundojë në gjykatë e të transformohet në një përplasje të egër. Në detaje Braida pretendon se është shkarkuar në mënyrë të padrejtë e për këtë kërkon pagesën e rrogës sipas kontratës.
Një situatë që rrezikon të bëhet problematike. Jo vetëm për një cështje ekonomike, por edhe raportesh. Për ta tensionuar edhe më shumë cështjen, ka shërbyer avokati i zgjedhur nga Braida për tu marrë me kontestimin legal. Sipas të përditshmes spanjolle, bëhet fjalë për Juan de Dios Crespo, i njëjti avokat që u mor me transferimin e Neymar nga Barcellona tek Psg në 2017, duke paguar klauzolën 222 milionë euro. Një cështje brenda cështjes me pak fjalë.
