Pas takimit të zhvilluar me ambasadorin e ri gjerman në vendin tonë, Peter Zingraf, kreu i Partisë Demokratike, Lulzim Basha, ka adresuar akuza të ashpra ndaj prokurores së Përgjthshme, Arta Marku dhe prokurores së Krimeve të Rënda, Donika Prela, për transferimin hetimit të dosjes 184 në Prokurorinë e Dibrës.
Në një deklaratë për mediat nga selia blu, kryedemokrati i quajti prokuroret si “Katicat” e Shqipërisë, duke bërë një analogji me prokuroren speciale të Maqedonisë së Veriut, Katica Janeva, emri i të cilës është njollosur nga një skandal i madh korrupsioni të njohur si rasti “Zhvatja”.
Sipas Bashës, mbyllja e dosjes 184 “nga Katicat e Ramës bëhet për të hequr dosjen nga SPAK-u”.
“Dy Katicat e Shqipërisë po mbrojnë politikanët e kapur në vjedhje dhe nuk po punojnë për ti cuar para ligjit politikanë që kanë vjedhur votat apo paratë e shqiptarëve, po bëjnë përpjekje për të mbyllur një cështje që e ka marrë vesh gjithë bota, përmes përgjimeve të Bild”- u shpreh Basha.
Lideri i opozitës së bashkuar joparlamentare shton se “me veprimet që kanë marrë të dyja janë penalisht të ndëshkueshme nga ligji, për shpërdorim detyre me qëllim mbulimin e një vepre të rëndë kriminale, sic është ngritja e një grupi të strukturuar kriminal, me përfshirje të përfaqësuesve të policisë, ministrisë, deputetëve të PS për të vjedhur zgjedhjet në Dibër”.
