Partia Demokratike ka reaguar ndaj deklaratës së kryebashkiakut të zgjedhur të Shkodrës, Valdrin Pjetrit, i cili më herët ka mohuar të ketë qenë dënuar dhe dëbuar nga Italia, duke hedhur poshtë akuzat dhe pretendimet e ngritura nga selia blu.
Në një deklaratë për shtyp, ish-deputetja e PD-së, Izmira Ulqinaku, tha se Pjetri po mashtron shkodranët duke harruar se të gjitha lëvizjet janë të monitoruara nga sistemi TIMS. Ulqinaku ka bërë publike edhe të dhënat e nxjerra nga sistemi TIMS, që tregojnë se kryebashkiaku i ardhshëm i Shkodrës, nuk ka udhëtuar drejt Italisë që prej vitit 2002.
“Partia Demokratike disponon dhe bën publik dokumentin e nxjerrë nga sistemi TIMS, ku vërtetohet se Valdrin Luigj Pjetri, nuk ka udhëtuar drejt Italisë nga viti 2002 deri në 2010.
Pra Vladrin Pjetri është kapur sot në një gënjeshtër të trashë, duke u përpjekur të mashtrojë qytetarët e Shkodrës.
- Pse i ndërpreve studimet në Itali, ku qendrove vetëm një vit?
2. Pse gënjen kur thua se ke shkuar rregullisht në Itali, ku sistemi TIMS konfirmon atë që PD ka thënë, që ti nuk ke shkelur në Itali në periudhën 2002- 2010?
3. A je arrestuar dhe a je dënuar me 18 muaj burg në Itali, apo edhe ti nuk din gjë për këtë si Elvis Rroshi i Kavajës?
4. A të kanë dëbuar nga Italia si person që përben rrezik për sigurinë publike atje?
5. A e njeh Altin Dodën dhe a ke qenë i përfshirë bashkë me të në trafik droge dhe vjedhje?
6. A buron pasuria jote nga trafiku i drogës dhe a jeni ju subjekt i ligjit antimafia?”- shkruhet në reagimin e degës së PD-së në Shkodër.
Pjetri u shpreh sot se do të pritet edhe kryerja e verifikimeve nga ana e Prokurorisë lidhur me këtë çështje, ndërsa ka shtuar se është i hapur për çdo lloj kërkese në adresë të tij. “Kam udhëtuar disa herë në drejtim të Italisë dhe kjo është lehtësisht e verifikueshme. Ky ngjan më shumë si një gjyq publik. Nuk jam ndaluar dhe as arrestuar në Itali. Jam i hapur për çdo verifikim të mundshme.”- ka thënë ai.
Sipas selisë blu, Pjetri preket nga ligji i dekriminalizimit pikërisht për shkak të ndalimit të tij në Itali në harkun njëvjeçar 2001-2002, duke shtuar se pas kthimit në Shqipëri, nuk ka udhëtuar më në drejtim të shtetit fqinjt për tetë vjet me radhë. Por, në formularin e vetëdeklarimit që kryebashkiaku i porsaemëruar i Shkodrës ka dorëzuar në Komisionin Qendror të Zgjedhjeve (KQZ), nuk rezulton të ketë shënuar dënim e dhënë ndaj tij nga autoritetet italiane.
Në formular, Pjetri ka pasqyruar vetëm qendrimin në qytetin e Firences në periudhën 2001-2002 për kryerjen e studimeve universitare. Ndërsa socialisti iu është përgjigjur negativisht pyetjeve në kategorinë “të dhëna mbi gjendjen gjyqësore të personit”.
