Të paktën tetë persona, përfshirë katër fëmijë, u plagosën nga të shtënat me armë zjarri gjatë një feste familjare për 4 korrikun në lagjen Coney Island të Bruklinit, në Nju Jork.
Sipas mediave amerikane, sulmuesi, i veshur me rroba të zeza dhe me fytyrën të mbuluar, iu afrua gardhit të banesës ku po zhvillohej festa dhe hapi zjarr ndaj të pranishmëve, përpara se të largohej nga vendi i ngjarjes.
Policia e Nju Jorkut (NYPD) njoftoi se ngjarja ndodhi rreth orës 22:35 të së shtunës. Të plagosur mbetën katër djem, 6, 7, 12 dhe 14 vjeç, dy gra 21 dhe 25 vjeçe, si dhe dy burra 33 dhe 37 vjeç.
Autoritetet bënë të ditur se 21-vjeçarja dhe 33-vjeçari u qëlluan në gjoks, ndërsa fëmija 6-vjeçar në bark. Tre të miturit e tjerë pësuan plagë në këmbë. Gruaja 21-vjeçare ndodhet në gjendje kritike, ndërsa shtatë të plagosurit e tjerë janë jashtë rrezikut për jetën.
Kryebashkiaku i Nju Jorkut, Zohran Mamdani, e dënoi sulmin, duke deklaruar se nuk ka vend për një dhunë të tillë në qytet dhe se autoritetet do të bëjnë gjithçka për ta luftuar atë.
Policia nuk ka identifikuar ende autorin dhe motivi i sulmit mbetet i paqartë. Sipas komisioneres së NYPD-së, Jessica Tisch, gjatë festës nuk ishte raportuar asnjë konflikt para të shtënave. Hetuesit po verifikojnë nëse ngjarja ka lidhje me një vrasje të dyshuar të lidhur me banda kriminale, e ndodhur javën e kaluar në të njëjtën zonë.
Në vendngjarje u sekuestruan një armë e tipit TEC-9 dhe 10 gëzhoja. Pak orë më vonë, një tjetër incident me armë zjarri u regjistrua në Bruklin, ku një detektiv i NYPD-së u qëllua gjatë përballjes me një 18-vjeçar të armatosur në lagjen Crown Heights. Plumbi goditi jelekun antiplumb të efektivit, i cili shpëtoi pa lëndime serioze.
