Me thirrjet “Rama në burg, Berisha në burg”, protestues dhe mbështetës pritën jashtë ambienteve të paraburgimit qytetarët e liruar pas vendimit të Gjykatës së Tiranës për masat e sigurisë ndaj 19 të arrestuarve pas protestës së zhvilluar para Kuvendit.
Pamjet tregojnë momentin kur protestuesit dalin nga paraburgimi dhe përshëndeten nga të pranishmit, të cilët i presin me duartrokitje dhe me thirrjet kundër klasës politike.
Pas më shumë se katër orësh shqyrtim, Gjykata e Tiranës vendosi masën “detyrim paraqitje” për 12 protestues, “arrest në shtëpi” për dy persona, ndërsa për pesë protestues të tjerë nuk caktoi asnjë masë sigurie.
Avokati Dorian Matlija deklaroi për mediat se ndaj protestuesve janë ngritur pesë akuza: kundërshtim i punonjësit të policisë (paragrafi 2), prishje e qetësisë publike, shkatërrim prone, pjesëmarrje në tubim të paligjshëm dhe pengim i qarkullimit.
Jashtë gjykatës u mblodhën protestues dhe përfaqësues të Grupit Koordinues, të cilët kërkuan lirimin e të arrestuarve, ndërsa tensionet vijuan edhe një natë më parë gjatë protestës në Tiranë.
Sipas vendimit të gjykatës, masa “detyrim paraqitje” u caktua për: Kujtim Pervataj, Romario Dushi, Ardit Ymaj, Niko Qarkaj, Ylli Shima, Ervis Gjoni, Frrok Bardhi, Rezart Pirani, Admir Tershalla, Alban Nikolli, Elvis Bici dhe Altin Hila.
Masa “arrest në shtëpi” u caktua për Ervin Gegën dhe Everes Bardhin.
Ndërsa për Arben Lleshan, Besard Kajmin, Aristotel Elezajn, Gentjan Prognin dhe Durim Banin, gjykata vendosi të mos caktojë asnjë masë sigurie.
