Zjarri në Fier ka shkaktuar dëme të konsiderueshme në bazën materiale të stacionit kryesor të furnizimit me ujë të qytetit. Ndërhyrja e parë për neutralizimin e tyre është kryer nga punonjësit e ujësjellësit.
Drejtori i Shoqërisë Rajonale të Ujësjellës-Kanalizimeve Fier, Gentian Alikaj, bëri të ditur se shërbimi zjarrfikës ishte fillimisht i angazhuar në mbrojtjen e banesave të rrezikuara, ndërsa më pas iu bashkua operacionit për shuarjen e flakëve në stacion.
Sipas Alikajt, zjarri ka nxjerrë jashtë funksionit linja furnizimi, mjete motorike dhe transformatorë, duke shkaktuar dëme të mëdha materiale. Megjithatë, ai theksoi se janë marrë masat për garantimin e sigurisë dhe se furnizimi me ujë për qytetin e Fierit nuk është ndërprerë.
Vatra e zjarrit, e cila ka nisur fillimisht pranë vendit të quajtur “Azotiku”, në fshatin Drizë, e më pas është përhapur në zonën e Qafës së Koshovicës, duke përfshirë sipërfaqe të pyllëzuara në afërsi të fshatrave Peshtan i Madh, Peshtan i Vogël, Drizë Myrtezaj dhe Plyg.
Për shkak të përmasave të zjarrit dhe erës së fortë që favorizon përhapjen e flakëve, shërbimet e Policisë kanë evakuuar 11 familje nga banesat e tyre, si dhe vijojnë të monitorojnë banesa dhe subjekte të tjera në zonë që mund të rrezikohen nga përhapja e flakëve.
