Prokurorja e Përgjithshme e Përkohshme, Arta Marku, pas prezantimit të raportit të përpiluar nga organi i akuzës lidhur me kriminalitetin në vend gjatë vitit 2018, iu referua edhe dosjeve të shumëpërfolura “339” dhe “184”.
Marku u shpreh se ka ardhur koha që këto çështje të zgjidhen dhe për këtë arsye, u ka kërkuar prokurorëve përkatës që kanë nën ngarkim dosjet, që të nxjerrin sa më shpejt konkluzionet dhe të dërgojnë çështjet në gjykatë.
“Dosjet 339 dhe 184 kanë hyrë në historinë ë drejtësisë dhe politikës shqiptare. Janë regjistruar më 2016 të dyja, të vetmet veprime deri në fund të 2018 ishin përgjimet, ka pas vetë transkripte. Në fund të 2017 u përcaktuan prokurorë të tjerë, për 339 dhe një oficeri policisë gjyqësore. Kjo dosje kur u morë nga prokurorët e tjerë u transkriptuan të gjitha CD, janë dërguar për gjykim shumë persona. Këto çështje duhen zgjidhur, ka ardhur momenti.
Prokurorët tani duhet të dalin në konkluzione. Ju kam kërkuar në çdo takim, që t’iu japin zgjidhje këtyre çështjeve. Për nxjerrjen e sekretit po hetohet nga Prokuroria e Krimeve të Rënda. Nisja e çështjes nuk është bërë pse dolën sekretet, por se nxjerrja e sekretit nga prokurorët përbën vepër penale dhe nuk mund të anashkalohet. Prokurorët duhet të dalin në konkluzione dhe t’i drejtohen gjykatës”, ka thënë Marku.
