Prokurorja e përkohshme e përgjithshme Arta Marku, në seancën e sotme parlamentare ka prezantuar raportin e Prokurorit të Përgjithshëm mbi gjendjen e kriminalitetit për vitin 2018.
Ajo tha se viti 2018 ka qenë një vit jo i zakonshëm për prokurorët dhe gjyqtarët për shkak të vetting-ut.
“Shumë prokurorë kanë qenë në kontakt të vazhdueshëm me KPK-në gjatë gjithë vitit. Vettingu i domosdoshëm, por i ka bërë prokurorët të pasigurt dhe apatikë”, tha ajo.
Marku tha se janë ndjekur gjithsej rreth 48 mijë procedime penale.
“Janë mbartuar nga viti 2017 , 10919 procedime penale. Janë regjistruar 109 procedime penale nga ana e prokurorisë. Ndërsa në 2018-ën, janë dërguar në gjykatë 11790 çështje”, tha ajo.
Numrin më të madh të procedimeve e ka regjistruar gjykata e shkallës së parë në Tiranë.
Përqindja më e ulët e kriminalitetit në Dibër, më e larta në Vlorë. Vjedhja e pasurive përbën numrin më të madh të procedimeve penale të regjistruara, u shpreh Marku.
