Ministrja e Shtetit për Marrëdhëniet me Parlamentin, Elisa Spiropali, ka reaguar përmes një postimi në llogarinë e saj personale në “Facebook”, pas konferencës së jashtëzakonshme të Presidentit të Republikës, Ilir Meta.
Duke përdorur notat e ironisë, Spiropali shkruan se arsyet që kreu i shtetit radhiti për të shpjeguar arysen e marrjes së vendimit për çdekretimin e 30 qershorit si datë të paracaktuar për mbajtjen e zgjedhjeve lokale, tregojnë se “Presidenti se është jo vetëm për të qarë hallin, por edhe për të mos harruar gazin”.
STATUSI I PLOTË
"E gjeta konsensusin tek këmbëngulja e të dyja palëve për të mos dialoguar! Këtë e thotë Presidenti i Shqipërisë, jo Bes Kallaku i Portokallisë. Duhet pranuar se kemi një president jo vetëm për të qarë hallin, po edhe për të mos harruar gazin."
Në deklaratën për mediat, Meta u shpreh se vendimi i tij u bë i domosdoshëm në kushtet e përshkallëzimit të ndërsjelltë dhe të vullnetshëm të qendrimeve dhe aksioneve të dy palëve politike për rritjen e tensionit në vend. Presidenti u bëri thirrje palëve politike që të gjejnë gjuhën e dialogut me qëllim zgjidhjen e krizës polike të vendit.
Meta theksoi në formën e një garancie për qytetarët se zgjedhjet do të zhvillohen në një datë të mëvonshme dhe brenda një afati në respektim të plotë të Kushtetutës.
