Prokuroria belge ka kërkuar të marrë dëshminë e kryetarit të Partisë Demokratike, Lulzim Basha, mbi denoncimin e bërë prej tij lidhur me rastin e njohur si "Toyota Yaris". Sipas raportimit të televizionit informativ "News 24", pala belge i ka dërguar një letërporosi Prokurorisë shqiptare që të marrë në pyetje Bashën për burimin dhe llojin e informacionit që dispononte për sasinë prej 3,4 milionë eurosh.
Pas kësaj kërkese, Krimet e Rënda kanë caktuar një seancë pyetjesh për kryedemokratin. Në retrospektivë kujtojmë se aksioni për bllokimin e sasive të eurove, të fshehura në një automjet pa targa të tipit “Toyota Yaris”, u finalizua më datë 24 qershor të vitit të kaluar. Mjeti që ishte nisur nga Belgjika dhe nuk kishte destinacion përfundimtar, ishte në një koncesion bashkë me mjete të tjera të cilat ishin porositur për shitje në Shqipëri.
Autoritetet shqiptare po vijojnë hetimit për të zbuluar dërguesin dhe porositësin e mallit. Për këtë rast ka patur shkëmbim replikash të forta politike mes Bashës, i cila ka akuzuar kreun e grupit parlamentar të Partisë Socialiste, Taulant Ballën, si të përfshirë në ngjarje. "Zgërdhihuni! Ai që zgërdhihet aty ishte edhe para tre ditësh në Gjermani. Të kanë zbuluar ‘Toyota Yaris’ o zgërdhitës me 1,5 milionë euro të drogës brenda, vazhdo qesh zgërdhitës. Shkonte në Gjermani ju thoshte ne s’kemi probleme, s’kemi drogë, korrupsioni po luftohet",- iu drejtua Basha Ballës gjatë fjalës së tij në Parlament në vitin 2018.
Më pas, deputeti socialist i mohoi akuzat, duke paditur Bashën në gjykatë. Përballja gjyqësore mes tyre vijon ende.
