Policia e Durrësit ka arrestuar shtetasin R.Y., 30 vjeç, një punonjës i gjendjes civile të Vllahinës, i cili dyshohet për kryerjen e veprave penale të shpërdorimit të detyrës dhe të falsifikimit të dokumentave. Ndalimi i 30-vjeçarit, banues në Mertiraj, Vlorë, u krye si rezultat i operacionit policor të koduar “Identiteti”, prej hetimeve të të cilit do të ndiqet në gjendje të lirë për të njëjtat vepra penale shtetasja K.P., punonjëse e gjendjes civile në Durrës.
Në kuadër të “Identiteti”-t, është shpallur në kërkim edhe shtetasi me inicialet V.Z., i cili ka aplikuar për t'u pajisur me pasaportë duke dhënë gjeneralitetet e një personi që kishte ndërruar jetë në vitin 1997, si edhe shtetasi E.K, punonjës i kompanisë “Aleat”, për arsye se ka vendosur gjurmët e gishtërinjëve të tij në aplikimin V.Z.-së.
Materialet hetimore do t’i përçohen Prokurorisë së Rrethit Gjyqësor të Durrësit për ndjekjen e veprimeve të mëtejshme mbi veprat penale “Korrupsion aktiv i personave që ushtrojnë funksione publike”, “Falsifikimi i letërnjoftimeve, i pasaportave ose i vizave”, “Shpërdorim i detyrës’ dhe “Korrupsion pasiv i personave që ushtrojnë funksione publike”.
