Shumë qytetarë kosovarë po kërkojnë që të heqin dorë nga shtetësia e tyre. Vetëm në vitin që lamë pas, 5 mijë qytetarë hoqën dorë nga shtetësia kosovare.
Problemi i liberalizimt të vizave, duket se është kryesori që po ndikon në braktisjen masive të kësaj shtetësie.
E kërkesat për lënien e shtetësisë së Kosovës nuk po ndalen as këtë vit. Në një përgjigje për lajmi.net nga ministria e Punëve të Brendshme e Kosovës, është bërë e ditur se vetëm gjatë muajit janar janë deponuar 378 kërkesa për lirim nga shtetësia kosovare.
Arsyet e kësaj dukurie lidhen me faktin se Gjermania nuk e njeh dyshtetësinë e qytetarëve të saj. Ndërkohë, Franca dhe Zvicra nuk e detyrojnë lirimin nga shtetësia.
Kryesisht kërkesa për lënien e shtetësisë së Kosovës kanë deponuar personat në moshë më të re. Republika e Kosovës, i lejon qytetarëve të saj mbajtjen e dy e më tepër shtetësive.
