Albion Nikolli, një prej protestuesve të arrestuar gjatë protestës së së enjtes para Kuvendit, është liruar këtë të shtunë pas disa ditësh qëndrimi në komisariat.
Gjatë protestës së mbrëmjes, ai falënderoi qytetarët për mbështetjen dhe deklaroi se protestuesit nuk janë "huliganë", por qytetarë që kërkojnë demokraci, shtet ligjor dhe luftë kundër autokracisë e korrupsionit.
Nikolli tha gjithashtu se, gjatë shoqërimit dhe qëndrimit në komisariat, efektivë të Policisë së Shtetit i kishin thënë vazhdimisht se ishin në mbështetje të protestuesve dhe se edhe ata përballeshin me vështirësi në punë.
“Jemi arrestuar në mënyrë të paligjshme. Nuk dua të viktimizohem, por shokë të mi kanë pësuar dhunë të jashtëzakonshme. Nuk na është ofruar ndihma mjekësore. Dua të them se protestuesit, ata djem, nuk janë huliganë. Nuk janë kundër ligjit e rendit kushtetues; janë kundër autokracisë. Janë për demokracinë, për shtetin ligjor, për ta kthyer Shqipërinë në shinat demokratike.
Ata duan që Shqipëria të mos jetë e kapur nga mafia, të mos u shitet oligarkëve vendas. Nuk janë heronj. Ju jeni heronj që keni ardhur çdo ditë në protestë. Faleminderit që erdhët të na mbështesni. Na keni dhënë një energji të jashtëzakonshme. Heronj janë ata që protestojnë, ata që qëndrojnë për të drejtat në përditshmëri. Policët, edhe pasi na kanë shoqëruar, janë me ne, por janë të shtypur nga ky sistem. Nuk u paguhen orët shtesë. Ky është mesazhi im”, tha Albion Nikolli.
