Çifti japonez Masao dhe Miyako Matsumoto, të martuar që nga Tetori i 1937, mbajnë rekordin Guinness si bashkëshortët më të moshuar në botë.
Por një tjetër rekord duket se vjen nga Kruja. Tv Klan ka sjellë historinë e Hamid Hoxhës, 105 vjeçar dhe Xhemjes që pret të mbushë të 100-tat të cilët kanë celebruar 81-vjetorin e martesës. Dy të panjohur që u panë vetëm në ditën e dasmës se tyre, i thanë “po” njëri-tjetrit në 24 Shtator të 1937-ës.
“Nuk e njihnim njëri-tjetrin” – thotë e moshuara.
“U pamë ditën e dasmës” – shton bashkëshorti i saj
Po Hamidi e kujton edhe sot të parin mendim kur Xhemja u shfaq në dasmë.
“Vallaj e bukur”.
Si prindër të 11 fëmijëve, për Hamidin dikur tregtar dhe Xhemen rrobaqepëse durimi dhe mirëkuptimi në çift kanë qenë shtylla e martesës 81-vjeçare.
“Unë kam qenë njëçikë e durueshme, nuk e kam kundërshtuar.”
“I kemi dëgjuar fjalën njëri-tjetrit, e kemi respektuar njëri-tjetrin” – thotë 105-vjeçari.
E megjithatë mes çiftit Hoxha nuk kanë munguar as xhelozitë.
“Ka qenë fanatik, ashtu ka qenë koha. Kur dilnim në rrugë me çadër me thoshte “ule çadrën mos të të shohë kush”, - tregon Xhemja.
“Sepse pleqtë kishin shumë fjalë”, - shprehet Hamidi.
Po Xhemja bëhej xheloze për ty?
“Po bëhej”.
Për fëmijët e çiftit Hoxha, jeta e prindërve të tyre ka qenë shembulli më i mirë.
“Na kanë edukuar me dëshirën për të punuar”, - thotë Hasani, djali i madh i çiftit Hoxha.
“Kam dëshirë që edhe fëmijët e mi të vazhdojnë sipas edukatës që na kanë dhënë prindërit”, - shprehet Xhevria.
Edhe për më të vegjlit e familjes, stërgjyshërit shekullorë mbeten kalaja e familjes. Ndoshta një rekordi të ri botëror? /Tv Klan
