Pasi uroi shqiptarët për vendimin pozitiv të Komisionit Europian për Shqipërinë, ambasadori amerikan Donald Lu deklaroi se Shqipëria duhet t’u vërë veshin shteteve anëtare të BE-së, të cilat kërkojnë rezultate konkrete kundër korrupsionit, krimit të organizuar dhe vazhdimin e reformës në drejtësi.
Sipas Donald Lu, Shqipëria ka ende kohë për të bërë përparim në këto çështje, përpara vendimit të qershorit, nëse për vendin do të hapen negociatat për anëtarësimin në BE.
“Unë nuk jam ambasador i një vendi të BE-së, por shpresoj se Shqipëria do t’ua vërë veshin shteteve anëtare që kanë kërkuar rezultate konkrete kundër korrupsionit, kundër krimit të organizuar dhe në reformën në drejtësi përpara vendimit për të hapur negociatat për anëtarësim. Përpara vendimit të qershorit, Shqipëria ka ende një mundësi për të bërë përparim në këto çështje me rëndësi kritike”, - u shpreh ambasadori amerikan për Top Channel.
