Kapet një sasi rekord kokaine në Portin e Durrësit. Sasia e kokainës së kapur brenda një kamioni është rreth 613 kg. Kjo është sasia më e madhe e kokainës e kapur ndonjëherë në Shqipëri.
Droga është gjetur gjatë kontrollit të ushtruar ndaj kamionit në terminal i cili vinte nga porti i Barit, në orën 06:00 të mëngjesit të sotëm. Dyshohet se droga vinte nga Kolumbia dhe kishte për destinacion vende të tjera të Europës, ndërsa në Shqipëri do kalonte tranzit.
Kokaina u zbulua si rrjedhojë e një hetimi ndërkombëtar ku kanë qenë të përfshira njësitë antidrogë të disa vendeve, përfshirjen edhe të DEA-s amerikane. Sinjalizimi për kokainën është bërë nga agjentë gjermanë dhe holandezë.
Policia ka ndaluar drejtuesin e kamionit dhe po heton në bashkëpunim me autoritetet e shteteve të tjera, për persona të përfshirë në trafikun e kokainës nga Shqipëria në drejtim të perëndimit.
