Deputetja e PD-së, Grida Duma u shpreh në emisionin “45 minuta” në Report Tv, se PD ka nisur përgatitjet për zgjedhjet vendore të 2019-ës. Sipas saj, kryetari i PD, Lulzim Basha po vijon konsultimet me qytetarët, grupet e interesit dhe forumet brenda PD, se kë do kandidojë për kryetar të Bashkisë së Tiranës, i cili do të jetë përballë kandidatit të mundshëm nga e majta, kryebashkiakut aktual, Erjon Veliaj.
“Jo vetëm që po mendohet, por po mendohet mjaft mirë që të jetë një strategji më e mirë. Patjetër që lidershipi i partisë e ka menduar dhe po e mendon. Shpresojmë të jetë një emër surprizë që surprizën mjaftueshëm sa për të tronditur ekranet që është Tirana me shi e nxjerr me diell”, - u shpreh Duma.
E pyetur nëse Erjon Veliaj duhet të frikësohet nga kandidati i opozitës, Grida Duma dha këtë përgjigje:
“Apriori çdo kandidat tronditet. Çdo kandidat i cili nuk e merr garën si një garë për të fituar nga pozita e të humburit, atëherë është një naiv politik. Padyshim që është i tronditur. Se kur do jetë momenti këtë e vendosë kryetari i PD-së” – tha Duma.
