Deputeti i PS-së, Bledi Çuçi, i cili është bashkëkryetari i komisionit të posaçëm për reformën zgjedhore, ka përgënjeshtruar kolegun e tij të PD-së, Oerd Bylykbashi, i cili ka deklaruar së është arritur konsensusi për votimin elektronil. Sipas Çuçit deri më tani nuk është arritur asnjë konkluzion sa i përket votimit elektronik.
“Unë nuk e di se për cilin komision parlamentar e ka fjalën Oerdi kur thotë se kemi vendosur me konsensus për votimin elektronik, por në Komisionin Parlamentar për Reformën Zgjedhore, të cilin unë dhe Oerdi e kryesojmë, deri më tash kemi miratuar një platformë mbi çështjet që ky Komision do të trajtojë, bazuar mbi rekomandimet e OSBE/ODHIR-it dhe probleme të tjera të zgjedhjeve në Shqipëri. Siç mund ta dëshmojnë edhe të 17 anëtarët e Komisionit nga të gjitha partitë parlamentare, në Komision nuk kemi arritur asnjë konkluzion e aq më pak vendim që lidhet me votimin elektronik, sepse, siç kemi rënë dakord me të gjitha palët, në Komision do të vazhdojmë të marrim vendime me konsensus pasi të kemi marrë ekspertizën më të mirë të vendit dhe ndërkombëtare”, thotë deputeti i PS-së, duke përsëritur kërkesën për të vazhduar fryma e konsensusit mes palëve.
