Izet Haxhia një nga të dënuarit e grupit të akuzuar si ekzekutorë të vrasjes së deputetit demokrat Azem Hajdari ka folur pas vendimit të gjykatës së lartë turke për ta ekstraduar në Shqipëri. Në një lidhje me skype nga Turqia për emisionin “Kjo Javë” në News 24 ai tha se për atë që konsiderohet “vrasja e shekullit” ka ende për të thënë. I dënuar me 25 vite burg për këtë vrasje ai tha se janë dënuar vetëm ekzekutorët, por jo organizatorët e saj.
“Është zbardhur vetëm ekzekutori. Janë përfshirë shumë segmente. Ka qenë shërbimi sekret shqiptar i përfshirë. Ka qenë “grupi i Rognerit”. Kanë pasur dijeni edhe shërbimet e huaja sekrete. Ajo nuk ka qenë një vrasje e momentit, por një vrasje e mirëmenduar.
Duhen zbardhur tabulatet e telefonatave para vrasjes nëpërmjet Berishës dhe Azemit. Nuk janë zbardhur ato telefonata të orëve të fundit. Janë të gjitha të regjistruara. Ka pasur një telefonatë të Azemit me Berishën që nuk është zbardhur. Është thënë që telefonata që e ka nxjerrë atë nga selia e PD-së kam qenë unë, bujrum dhe le ta vërtetojnë. Ka pasur disa telefonata të tjera Berishës me Azemin. Edhe ato nuk janë zbardhur” – tha Haxhia, ish-badigard i Sali Berishës kur ky ishte President i Republikës. Ai tha se gjatë kësaj kohe ka pasur kontakte nga politikanë të së majtës, por nuk është takuar me ta.
“Që nga vitet 97 – 98 nuk kam pasur asnjë lloj kontakti me politikanë. Para disa muajsh më ka marrë në telefon një emër shumë i njohur i politikës nga radhët e mazhorancës së sotme. Më ka kontaktuar duke thënë se ndodhej në Stamboll për arsye shëndetësore, por nuk e kam takuar” – tha Haxhia. ©LAPSI.al
