Studentët kanë nisur protestën e radhës para Ministrisë së Arsimit, duke bllokuar Rrugën e Durrësit dhe duke kërkuar sërish dorëheqjen e kryeministrit Edi Rama. Në zonë janë vendosur forca të shumta policie, ndërsa përmes megafonit protestuesve u është kërkuar të lirojnë rrugën dhe të mos pengojnë qarkullimin. Për mbarëvajtjen e tubimit janë angazhuar rreth 700 efektivë.
Gjatë protestës, studentët kanë ngritur fletë që formonin mesazhin “Ne nuk harrojmë”, duke iu referuar përplasjeve dhe ndërhyrjeve policore gjatë tubimeve të mëparshme. Nga turma janë dëgjuar edhe thirrje kundër policisë, ndërsa studentët kanë akuzuar efektivët për dhunë gjatë protestave të kaluara. Tubimi zhvillohet në ditën e 168-të të mobilizimit, me studentët që vijojnë të kërkojnë largimin e kryeministrit.
