Kandidati i Partisë Demokratike në Qarkun e Korçës, Klevis Balliu, është rivënë sërish në qendër të rrjeteve sociale. Në një takim me banorët e zonës së Mokrës në Pogradec, Balliu i ri po u shpjegon njerëzve se çfarë është deputeti. Sipas tij, deputeti është profesion dhe ai “raprezanton” e përfaqëson hallet e njerëzve. Video është kthyer virale për shkak se edhe një plak i zonës miraton me gjeste çdo fjalë të Balliut deri në formë tallëse. Kandidati i PD u vu në shënjestër të medias që ditën e parë të kandidimit të tij për shkak të gabimeve kuptimore dhe në drejtshkrim. Fjalimi i tij i çuditshëm në Pogradec se do sjellë “diell demokratik” apo “të rinjtë rrijnë kafeve për shkak të papunësisë së punësimit” si dhe premtimet e rralla për ta bërë Pogradecin prefekturë, kanë pasur jehonë në media.
