Pas nismës për mbylljen me ligj të lojërave të fatit nga 1 janari 2019, shoqëritë që e ushtronin këtë aktivitet dolën nga lista e më të mëdhave, si për të ardhurat, ashtu dhe fitimet. Vetëm “Regency Casino” vijoi të kishte aktivitet.
Por, viti 2021 solli rihyrjen në listë të kompanisë së parë, që u rikthye nëpërmjet menaxhimit të kazinove në hotelet me 5 yje.
Në vitin 2025, aktiviteti i tyre është rritur, i ndikuar dhe nga turizmi, teksa shoqëri të tjera po i afrohen listës së “Monitor 200”.
“Adria Entertainment” raportoi të ardhura prej 3.4 miliardë lekësh, me rritje vjetore prej 12.4%. Sipas raportit të aktivitetit, 84% e të ardhurave erdhën nga aktiviteti i kazinosë dhe pjesa tjetër kryesisht nga shërbimet e barit.
“Të ardhurat nga aktiviteti i operimit të kazinove, që përbëjnë zërin kryesor të të ardhurave, u rritën me rreth 3%.
Ndërkohë, të ardhurat nga aktiviteti dytësor i barit shënuan rritje të fortë, prej 136% me bazë vjetore. Detyrimet e paguara që përbëjnë tatimet dhe taksat zënë një peshë specifike prej 34% të të gjithë shpenzimeve të vitit ushtrimor”, thuhet në raportin e aktivitetit.
“Gjatë vitit 2025, ka pasur frekuentim të klientëve të huaj dhe punonjësve të huaj që punojnë në kompaninë tonë, ky pozicionim ka promovuar ekonominë e vendit duke rritur më së shumti të ardhurat që vijnë indirekt në sektorin e akomodimit dhe operatorëve që operojnë në sektorin e fluturimeve”. Numri i të punësuarve ishte 326.
“Adria Entertainment” menaxhon “Grand Casino Tirana”, që operon në ambientet e “Maritim Hotel Plaza Tirana”. Shoqëria u licencua në maj 2020 për kategorinë “kazino të vendosura në hotele me 5 yje”.
“Adria Entertainment” është ish-“Apex-Al”, një nga operatorët e mëparshëm të lojërave të fatit në Shqipëri.
“Regency International Casino Tirana” ka rikuperuar aktivitetin dy vitet e fundit, pas rënies që shënoi nga pandemia. Në vitin 2025, të ardhurat arritën në 2.6 miliardë lekë, me zgjerim prej 11.4%. Shoqëria ka 1001 makina elektronike, sipas raportit vjetor. Shoqëria ka 465 të punësuar.
“Space +” është shoqëria që menaxhon kazinonë në “Arena Center”, në pronësi të “GLG Investment”, e themeluar në vitin 2021. Shoqëria deklaroi të ardhura prej 2.1 miliardë lekësh në vitin 2025, pothuajse në të njëjtin nivel me vitin e mëparshëm. Kompania ka 264 të punësuar.
“Balkan Interactive Group” (BIG), një shoqëri e krijuar në vitin 2022 në pronësi të “Valona Konstruksion”, administron kazinonë në “Radisson Collection Morina Hotel Tirana”. Shoqëria deklaroi të ardhura prej 639 milionë lekësh në vitin 2025, me rritje 49%. Shoqëria kishte 127 punonjës në vitin 2025.
Fillimi i ri i lojërave të fatit
Në vitin 2018, viti i fundit i aktivitetit të lojërave të fatit, qarkullimi vjetor i kompanive të licencuara ishte rreth 140 milionë euro, ku 60% e totalit vinte nga kazinotë, sipas të dhënave të mëparshme të “Monitor” në renditjet e kompanive më të mëdha në vend.
Ky ishte vetëm tregu zyrtar, ndërsa vlerësimet e aktivitetit real ishin disa herë më të larta, për shkak të informalitetit masiv.
“Apex-Al”, “Lotto Sport”, “Top Sport” dhe “Adriatik Game” ishin ndër operatorët më të mëdhenj të lojërave të fatit në vend.
Në vitin 2017, secila prej tyre realizonte një qarkullim vjetor prej rreth 2.2-2.5 miliardë lekësh. ITSGA ishte kompania më e madhe për nga numri i të punësuarve, me rreth 3 mijë punonjës dhe të ardhura prej 1.4 miliardë lekësh. Sektori ishte ndër më fitimprurësit në ekonomi, me norma fitimi që për disa operatorë luhateshin nga 30% deri në 70%.
Në fund të vitit 2018, qeveria mbylli kazinotë elektronike, bastet sportive, bastet për garat në pistë, sallat e bingove dhe lojërat e fatit online. Përjashtim bënin kazinotë e vendosura në hotele me 5 yje, ndërsa “Regency”, që operonte te Parku Rinia me një licencë 10-vjeçare, vijoi aktivitetin deri në përfundimin e afatit të saj.
Në vitin 2020 u përcaktua edhe zona në Tiranë ku mund të ushtrohej aktiviteti i kazinove dhe më pas u hap procedura për aplikimet e operatorëve të interesuar. Aktualisht, në kryeqytet dhe në bregdet funksionojnë të paktën pesë kazino të vendosura në hotele ndërkombëtare ose “brand name”, por vetëm një prej operatorëve të tyre rezulton në renditjen “Monitor 200”.
Në qershor të vitit 2023, qeveria miratoi ligjin që riktheu bastet, por vetëm online. Ai parashikon se bastet online do të luhen nëpërmjet telefonave, tablet-ëve, iPad-ëve, laptop-ëve, por pa u kufizuar vetëm në to, si dhe në faqet zyrtare të internetit, aplikacionet e subjekteve të licencuara për ushtrimin e aktivitetit “baste sportive online”./Monitor.al
