Miley Cyrus ka reaguar me një dedikim prekës pas ndarjes nga jeta të kumbarës së saj, legjendës së muzikës country Dolly Parton, e cila vdiq në moshën 80-vjeçare.
Këngëtarja 33-vjeçare ndau të martën një mesazh emocional në Instagram, ku foli për dhimbjen e humbjes së një prej njerëzve më të rëndësishëm në jetën e saj.
“Ndjenja e humbjes së tezes sime Dolly është përtej asaj që ndihem në gjendje të ndaj. Momentet tona më të shenjta ishin private dhe aty do të mbeten, pas skenës, nën shkëlqimin dhe mes zemrave tona”, shkroi Cyrus.
Ajo shtoi se prania e Parton do të vazhdojë të ndihet edhe pas vdekjes së saj.
“E di që Dolly do të donte që ta ndieja këtë dhimbje, të shkruaja një këngë për të dhe më pas të vazhdoja përpara e të isha e fortë. Kam një engjëll pranë meje. Gjithmonë e kam pasur”, u shpreh këngëtarja.
Cyrus zbuloi gjithashtu se një nga bisedat e fundit me kumbarën e saj kishte qenë për muzikën dhe ndryshimin.
“Do ta dua gjithmonë dhe do të dua ta bëj krenare. Zemra ime është thyer për botën, familjen dhe miqtë e saj që do ta ndiejnë thellë mungesën e saj. Jemi të gjithë bashkë në këtë dhimbje dhe do ta shohim atë në çdo gjë të bukur”, shkroi ajo.
Lidhja mes Miley Cyrus dhe Dolly Parton ka qenë e veçantë që prej fëmijërisë së këngëtares. Parton kishte treguar se u bë kumbara e Miley-t pasi babai i saj, Billy Ray Cyrus, i kërkoi ta merrte këtë rol.
“E kam njohur që kur ishte bebe. Babai i saj është miku im dhe kur ajo lindi, më tha: ‘Duhet të jesh kumbara e saj’. Dhe unë thashë: ‘E pranoj’”, kishte treguar Parton në vitin 2009.
Edhe pse nuk zhvilluan një ceremoni zyrtare, Parton e konsideronte Miley-n si një nga fëmijët e saj dhe e mbështeti që në hapat e parë të karrierës.
Në vitin 2006, Dolly Parton u shfaq në serialin e Disney Channel “Hannah Montana”, ku interpretonte edhe Cyrus. Ajo kishte besim të madh te talenti i vajzës së re dhe parashikonte se Miley do të kishte një karrierë të suksesshme edhe pas përfundimit të serialit.
Dy këngëtaret bashkëpunuan edhe në muzikë. Parton mori pjesë në albumin rock të Cyrus, “Rockstar”, në vitin 2023, ku realizoi një version të këngës “Wrecking Ball”. Ato kishin bashkëpunuar më herët edhe në këngën “Rainbowland”, të publikuar në albumin “Younger Now” të Cyrus në vitin 2017.
Miley gjithashtu ka interpretuar këngën ikonike të Parton, “Jolene”, në një performancë të “Backyard Sessions” në vitin 2012, e cila u bë virale.
Dolly Parton u nda nga jeta në moshën 80-vjeçare, pas problemeve shëndetësore që kishin shqetësuar fansat gjatë muajve të fundit. Lajmi për vdekjen e saj u konfirmua nga familjarët.
