Kylie Jenner është përballur me një padi të re nga ish-shefja e saj personale, e cila pretendon se kushtet e vështira të punës dhe mungesa e mbështetjes gjatë një shtatzënie me rrezik të lartë çuan në humbjen e foshnjës së saj.
Sipas dokumenteve të depozituara në Gjykatën e Lartë të Los Angeles, gruaja – identiteti i së cilës nuk është bërë publik – pretendon se punonte 11 deri në 12 orë në ditë, pesë ditë në javë, dhe kryente detyra të rënda fizike, pavarësisht se kishte njoftuar eprorët për shtatzëninë e saj me rrezik.
Ajo thotë se nisi punën si shefe personale e Jenner në nëntor 2024 dhe një muaj më vonë informoi drejtuesit se ishte tre muajshe shtatzënë, duke kërkuar përshtatje të arsyeshme për të mbrojtur shëndetin e saj.
Në padi pretendohet se në natën e Vitit të Ri 2024 ajo u detyrua të transportonte pa ndihmë ushqime të rënda në një terren të pjerrët, çka i shkaktoi marramendje, vështirësi në frymëmarrje dhe nevojë për ndihmën e stafit të sigurisë.
Një tjetër incident, sipas saj, ndodhi gjatë organizimit të festës së ditëlindjes së njërit prej fëmijëve të Kylie Jenner në Palm Springs, në fillim të shkurtit. Ajo pretendon se nuk mori ndihmën e kërkuar, u mbingarkua fizikisht dhe emocionalisht dhe shpërtheu në lot gjatë aktivitetit.
Të nesërmen, sipas padisë, ajo nisi të kishte hemorragji të rëndë dhe në spital u informua se nuk kishte më rrahje zemre të fetusit, duke humbur kështu shtatzëninë.
Ish-punonjësja pretendon gjithashtu se, pak ditë pas ngjarjes, u akuzua padrejtësisht për gjendjen e kuzhinës pas eventit dhe më pas u qortua nga një prej drejtuesve të saj, i cili i tha: "Ndalo. Po e mërzit Kylie-n. Po e bën të ndihet në depresion."
Në padi ajo kërkon dëmshpërblim për diskriminim gjatë shtatzënisë, ngacmim në vendin e punës, mungesë të akomodimeve të nevojshme, pagesa të paplota dhe pushim të padrejtë nga puna.
Përfaqësuesit e Kylie Jenner nuk kanë komentuar ende mbi akuzat.
Kjo është padia e tretë që ngrihet ndaj Jenner nga ish-punonjës të saj gjatë vitit 2026. Në muajin prill, dy ish-pastruese të saj ngritën padi të veçanta, duke e akuzuar për diskriminim, trajtim të padrejtë dhe krijimin e një ambienti toksik pune.
