Një zbulim mahnitës arkeologjik është bërë në nekropolin e Saqqara, pranë Kajros në Egjipt, pasi një ekip arkeologësh spanjollë dhe egjiptianë kanë zbuluar varrin e një gjykatësi mbretëror, që vlerësohet të jetë 4400 vjeçar.
Siç u njoftua nga Ministria e Turizmit dhe Antikiteteve egjiptiane, varri daton që nga epoka e faraonit Zendkare Izezi, i Dinastisë së 5-të, i cili mbretëroi midis viteve 2381-2353 para Krishtit. Ai përmban "dy faltore funerale që u përkasin dy zyrtarëve të lartë, Yunmen dhe babait të tij, Itit".
Sipas autoriteteve lokale, një burrë i quajtur "Yunmen" u varros në atë vend, i cili ishte një gjykatës mbretëror me autoritetin për të dëgjuar ankesat e popullit. Zbulimi u bë në verë. Relievet dhe ngjyrat e tyre origjinale janë në gjendje të shkëlqyer.
Për ekipin arkeologjik, zbulimi ishte gjithashtu një surprizë për shkak të pasurisë dhe bukurisë së monumentit. Ndër karakteristikat më të spikatura janë një epistil me cilësi të lartë dhe tekste funerale të përshtatura për personalitetin dhe pozicionet e pronarit të tyre.
Ministria egjiptiane gjithashtu thekson gjendjen e shkëlqyer të ruajtjes së skenave dhe relieveve , të cilat përshkruajnë "aktivitete bujqësore dhe procesione me oferta", dhe vëren se shumë prej tyre "kanë ruajtur ngjyrat e tyre origjinale ".
Dekorimi përfshin përshkrime të gomarëve dhe kafshëve të tjera. Sipas autoriteteve egjiptiane, zbulimi “ofron prova të reja dhe të vlefshme rreth arkitekturës, artit dhe jetës administrative të Egjiptit të lashtë në fund të Dinastisë së Pestë”.
Përveç vlerës së saj historike dhe shkencore, “mastaba” (emri arab për varret në formë piramide të Egjiptit të lashtë) shquhet për bukurinë e saj. Arkeologët besojnë se varri i dyfishtë mund të pasqyrojë ngritjen shoqërore të Yunmen, djalit të një zyrtari provincial i cili u ngrit në një pozicion të lartë në administratën qendrore dhe donte të ndante fatin e varrimit me të atin.
Zona njihet nga gërmimet e kryera nga Auguste Mariette në shekullin e 19-të, por nuk ishte studiuar dhe dokumentuar kurrë në thellësi. Hulumtimi kishte për qëllim rindërtimin e topografisë së Saqqara-s dhe kuptimin e nekropolit si një hapësirë jetese, ku egjiptianët e lashtë sillnin oferta dhe punonin vazhdimisht në ndërtimin e monumenteve funerale.
Qëllimi është të kuptohet se si ishte i organizuar dhe funksiononte nekropoli, nga rrugët dhe sheshet e tij deri te lëvizja e njerëzve dhe ritualet e adhurimit. Analiza e hartave dhe rindërtimi i planit e çuan ekipin në një mastaba të panjohur më parë dhe në indikacionet e dy të tjerave aty pranë, të cilat ata shpresojnë t'i gërmojnë në periudhat e ardhshme. ©LAPSI.al
