Taylor Swift ka dalë fituese në një tjetër betejë ligjore, pasi një gjykatë federale në SHBA ka rrëzuar padinë e ngritur nga poetja Kimberly Marasco, e cila pretendonte se disa prej teksteve të këngëtares kopjonin poezitë e saj.
Sipas vendimit të gjyqtares Aileen M. Cannon, idetë bazë, temat, metaforat, fjalët e veçuara dhe frazat e shkurtra nuk mbrohen nga ligji për të drejtën e autorit dhe, për rrjedhojë, nuk mund të konsiderohen shkelje të copyright-it.
Gjykata theksoi gjithashtu se Marasco nuk arriti të provonte se Taylor Swift kishte pasur qasje në veprat e saj apo se ekzistonte një ngjashmëri e konsiderueshme mes krijimeve të tyre, dy elemente thelbësore për të mbështetur një pretendim për plagjiaturë.
Një nga pretendimet e poetes lidhej me këngën "The Man", ku ajo argumentonte se disa vargje ngjanin me poezinë e saj "Ordinary Citizen". Megjithatë, gjykata vlerësoi se temat e trajtuara, si përvoja e një gruaje në ambientin e punës, janë ide të përgjithshme dhe nuk gëzojnë mbrojtje nga e drejta e autorit.
Vendimi u dha vetëm pak ditë pasi Taylor Swift u martua me Travis Kelce në New York dhe e mbyll përfundimisht këtë çështje, pasi padia është rrëzuar me paragjykim, çka do të thotë se Kimberly Marasco nuk mund ta paraqesë sërish të njëjtën padi në të ardhmen.
Ekipi ligjor i Swift e kishte cilësuar më herët padinë si "absurde dhe të pabazuar ligjërisht", duke theksuar se kjo ishte tentativa e dytë e poetes për ta paditur këngëtaren.
