
Kreu i Partisë Demokratike, Sali Berisha, komentoi raportimet për një deklaratë që i ishte atribuuar Pandeli Majkos në Asamblenë e Partisë Socialiste. Sipas këtyre raportimeve, Majko u kishte kërkuar socialistëve që mund të ishin përfshirë në video erotike të jepnin dorëheqjen, përpara se publikimi i tyre t’i shkaktonte kosto elektorale partisë.
Majko i ka përgënjeshtruar lajmet që e citonin në këtë mënyrë, megjithatë, Berisha pretendoi se video të tilla ekzistojnë dhe do të publikohen.
“Po denoncimi Majko?! Ta garantoj unë ty, kaq naiv Gjinua nuk është që të ngatërrojë skenat erotike me skenat e tjera. I keni edhe ato ju dhe do të dalin. Prandaj më mirë largohuni, se do të dalin”, tha Berisha.
Kreu i PD-së akuzoi gjithashtu kryeministrin Edi Rama se përdor përfshirjen e bashkëpunëtorëve në afera korruptive si një mënyrë për t’i mbajtur nën kontroll.
Ai përmendi ish-drejtuesen e SHISH-it, Vlora Hyseni, duke ngritur një pretendim për një shumë prej një milion eurosh, pa sqaruar në deklaratën e cituar se çfarë përfaqësonte kjo shumë.
“Edi Rama ka përdorur një taktikë të veçantë, taktikën e përlyerjes së secilit. Çfarë ishin 1 mln euro të Vlora Hysenit, ai vetë e kishte emëruar. Këshilltare e kishte pasur, nuk mjaftonin këto”, u shpreh Berisha.