Sot përfundon afati kushtetues për zgjedhjen e presidentit të republikës së Kosovës. Deri më tani është propozuar vetëm një kandidat për këtë post, deputeti Glauk Konjufca.
Kryetarja e Kuvendit të Kosovës, Albulena Haxhiu, ka bërë të ditur një ditë më parë se kandidatura e Konjufcës është dorëzuar me 30 nënshkrime deputetësh nga Lëvizja Vetëvendosje dhe nga grupi multietnik.
“Në cilësinë e kryetares së Kuvendit kam pranuar vetëm një kandidaturë për president, e cila është propozuar nga 30 deputetë nënshkrues. Sipas dokumentacionit, një pjesë e deputetëve nga Grupi Parlamentar i VV-së dhe disa deputetë nga grupi multietnik kanë nominuar Glauk Konjufcën”, deklaroi Haxhiu gjatë një konference.
Ajo theksoi se procedura e votimit nuk mund të fillojë pa u përmbushur kushti që të ketë së paku dy kandidatë të propozuar me nënshkrimet e nevojshme të deputetëve.
“Derisa nuk kemi të paktën dy kandidatë që kanë siguruar mbështetjen e kërkuar, nuk mund të thërras seancë për zgjedhjen e presidentit”, tha ajo në konferencën për media, të mërkurën.
Sipas Kushtetutës së republikës së Kosovës, kjo çështje rregullohet me Nenin 86. Në pikën 2 të këtij neni përcaktohet se zgjedhja e presidentit duhet të bëhet jo më vonë se 30 ditë para përfundimit të mandatit të presidentit aktual.
