Një pikë këmbimi valutor brenda një qendre tregtare në zonën e "5 Majit" në Tiranë u grabit nën kërcënimin e armës këtë të enjte. Autori, i cili veproi i vetëm, mori një shumë parash dhe u largua me vrap. Shuma e grabitur nuk është bërë ende e ditur.
Informacion paraprak:
Rreth orës 09:10, në rrugën “5 Maji”, një shtetas ende i paidentifikuar, nën kërcënimin e një sendi në dukje armë zjarri (pistoletë), ka vjedhur një shumë parash në një pikë këmbimi valutor brenda një qendre tregtare dhe është larguar nga vendi i ngjarjes.
Menjëherë pas marrjes së njoftimit, shërbimet e Policisë kanë shkuar në vendngjarje, kanë bërë rrethimin e zonës dhe kanë ngritur pika kontrolli në akset rrugore përreth.
Shërbimet e Policisë po krehin zonën dhe po vijojnë kontrollet me qëllim kapjen e autorit. Ndërkohë, grupi hetimor po punon për sqarimin e plotë të rrethanave të rastit.
