Leonardo DiCaprio ka kujtuar Diane Keaton, pas lajmit për ndarjen e saj nga jeta të shtunën, më 11 tetor.
Aktori 50-vjeçar ndau në Instagram Story një foto të rrallë nga vitet ’90, kur të dy luanin së bashku në filmin "Marvin's Room" (1996).
“Diane Keaton ishte një e vetme në llojin e saj. E jashtëzakonshme, gazmore dhe pa kompromis në autenticitetin e saj,” shkroi DiCaprio. “Një legjendë, një ikonë dhe një njeri vërtet i mirë. Kisha nderin të punoja me të që kur isha 18 vjeç. Do të na mungojë thellësisht,” përfundoi aktori.
Në "Marvin's Room", Keaton luante rolin e Bessies — hallës së Hank-ut, një adoleshent problematik që interpretohej nga DiCaprio. Filmi i regjisorit Jerry Zaks përfshinte edhe emra të tjerë të mëdhenj të kinemasë si Meryl Streep dhe Robert De Niro.
Lajmi për ndarjen nga jeta të Diane Keaton, në moshën 79-vjeçare, u konfirmua të shtunën. Një përfaqësues i saj tha për PEOPLE se “familja kërkon privatësi në këtë moment të trishtuar”.
Përveç DiCaprios, edhe yje të tjerë të njohur kanë shprehur dhimbjen për humbjen e aktores. Bette Midler dhe Goldie Hawn, bashkë me të cilat Keaton ka luajtur në filmin klasik The First Wives Club, ndanë kujtimet dhe fjalët e tyre për mikeshën e ndjerë.
Midler e quajti Keaton një “brilante, e bukur dhe jashtëzakonisht origjinale”, duke shtuar: “Ishte qesharake, pa komplekse dhe e sinqertë. Ajo që shihje ishte ajo që ishte vërtet... oh, la, la!”
