Aktorja e njohur e serialit “Friends”, Jennifer Aniston, po përflitet për një romancë të re me Jim Curtis, një hipnotist dhe trajner personal të cilin ajo e ka ndjekur prej vitesh.
Çifti i përfolur është fotografuar së fundmi duke kaluar pushime intime në ishullin spanjoll Mallorca, së bashku me miqtë e ngushtë të Aniston – aktorin Jason Bateman dhe bashkëshorten e tij Amanda Anka, gjatë fundjavës së 4 Korrikut.
Në njërën prej fotove, Aniston shihet duke prezantuar Curtis-in te miqtë e saj. Më vonë, ata kanë shijuar një festë në jaht, sipas të njëjtit burim.
Aniston dhe Curtis e ndjekin njëri-tjetrin në Instagram, ku ky i fundit numëron mbi 500 mijë ndjekës. Aktorja ka pëlqyer disa nga postimet e tij, shumica prej të cilave fokusohen në fuqinë e manifestimit, shërimit emocional dhe vetëdashurisë.
Në një prej videove të tij më të fundit, Curtis thotë:
“Besoj se dashuria mund të jetë e sjellshme, e qëndrueshme dhe e vërtetë. Është e sigurt për mua të shihem, të duhem dhe të zgjidhem. E lëshoj dhimbjen e të kaluarës.”
Aniston e ka pëlqyer këtë postim, i cili shoqërohej me përshkrimin: “Përsëriti këto afirmime për të shëruar veten pas një divorci, ndarjeje apo lidhjeje të vështirë, dhe për të tërhequr një dashuri të re, të shëndetshme e të fuqishme.”
Jennifer ka qenë më parë e martuar me aktorin Brad Pitt (2000–2005) dhe më pas me aktorin e “The Leftovers”, Justin Theroux (2015–2018). Deri tani, ajo nuk ka konfirmuar publikisht ndonjë lidhje të re, megjithëse miqtë e saj kanë thënë se ajo është më e fokusuar se kurrë në mirëqenien personale dhe rrethimin me energji pozitive.
