Në një fjalim të drejtpërdrejtë ndaj qytetarëve iranianë, lideri i Iranit, Ajatollah Ali Khamenei, reagoi ashpër ndaj sulmeve izraelite, duke i quajtur “një gabim të madh” dhe duke premtuar ndëshkim të pashmangshëm për shtetin hebre.
“Populli nuk do ta harrojë gjakun e martirëve tanë, as sulmin në territorin e shenjtë të vendit tonë,” deklaroi Khamenei, duke nxitur një narrativë hakmarrjeje të përshkuar nga simbolika fetare dhe patriotike. Ai vlerësoi reagimin e qytetarëve iranianë, të cilin e përshkroi si “të palëkundur, të guximshëm dhe të qëndrueshëm” përballë “agresionit dashakeq të armikut sionist”.
Por fjala e tij më e fortë ishte drejtuar drejt Shteteve të Bashkuara dhe konkretisht ish-Presidentit Donald Trump, të cilin e kritikoi për “deklarata kërcënuese” ndaj Iranit, në një kohë kur tensionet janë në kulm dhe çdo mesazh nga Uashingtoni shihet si sinjal për përfshirje direkte në konflikt.
“Njerëzit e mençur që e njohin Iranin, kombin iranian dhe historinë e tij nuk do të flasin kurrë me gjuhë kërcënuese,” u shpreh ai me ton sfidues. “Kombi iranian nuk do të dorëzohet dhe amerikanët duhet ta dinë se çdo ndërhyrje ushtarake nga SHBA-të padyshim do të shoqërohet me dëme të pariparueshme.”
