Që nga ora 15:00, sistemet e transmetimit të telefonisë celulare janë çaktivizuar në të gjithë Vatikanin. Telefonat celularë, kompjuterët personalë dhe tabletët u janë "konfiskuar" 133 kardinalëve që janë mbyllur në Kapelën Sistine për të zgjedhur Papën e ri.
Në orën 17:46, ata bënë betimin dhe më pas u izoluan. Këtë mbrëmje atë kanë kryer edhe votimin e parë. Tymi i parë ishte planifikuar të dilte nga oxhaku i famshëm në orën 19:00, por ende nuk ka asnjë shenjë.
Nëse nuk do të jetë i bardhë do të ketë 4 votime të tjera të enjten. Po kështu edhe të premten. 30 mijë njerëz janë duke pritur në sheshin “Shën Pjetër” të Vatikanit.
Askush nuk e di se çfarë ka ndodhur dhe arsyet që tymi në oxhak po vonohet sepse ajo që ndodh në Kapelën Sistine ku zhvillohet votimi i Konklavës është një sekret absolut. Në shesh ka plot me njerëz: besimtarë, pelegrinë, njerëz kuriozë, turistë dhe shumë të huaj.
Të gjithë po presin me padurim, me sytë e ngulur te oxhaku që së shpejti duhet të shpallë rezultatin e votimit të parë për Papën e ri. Pavarësisht turmës, mbretëron një heshtje pothuajse sureale dhe e vetmja gjë që dëgjohet është rrotullimi i helikopterëve. /LAPSI.al
