Gazetarja Klodiana Lala ka treguar disa detaje në lidhje me një hakerim të sistemit të brendshëm të SPAK. E ftuar në emisionin “Opinion”, Lala tha se në lidhje me këtë rast është thirrur në SPAK edhe një Sekretar i Përgjithshëm i një ministrie që dyshohet se ka bërë shpërndarje materialesh të prokurorisë. Po ashtu ajo theksoi se prokurorët kanë bërë kontrolle në zyrën dhe banesën e një ish-zyrtari të lartë.
“Është thirrur edhe një Sekretar i Përgjithshëm i një ministrie që po ashtu ka bërë shpërndarje materialesh të SPAK-ut. I është këqyrur telefoni dhe janë marrë të dhënat. Është bërë kontroll në banesën dhe në zyrën e një ish-zyrtari të lartë ta saktësoj i cili ka shërbyer në disa poste kryesore dhe kyçe në administratën shqiptare.
Në këndvështrimin tim dy personat e arrestuar mendoj që janë thjesht një pjesë e hallkës ose njerëzit që janë pjesa e fundit e gjithë kësaj. Unë mendoj që aty bëhet fjalë për një skemë mafioze që sigurisht ka një mendje shumë të thellë dhe që kjo çështje do të ishte për shantazh jo vetëm të njerëzve të politikës, por edhe ndaj njerëzve të biznesit.
LEXO EDHE: Skandal në SPAK? Vidhen dosjet nga komjuterat e 3 prokurorëve, në pranga 2 persona
Sigurisht që ato materiale mund të përdoreshin për gjobvënie, shantazh në prag të fushatës zgjedhore, mund të përdoreshin për të dëmtuar reputacionin e SPAK-ut, për të dëmtuar prokurorë të caktuar”, tha Lala. /LAPSI.al
