Kreu i PD, Sali Berisha ka komentuar përplasjen e ashpër mes Edi Ramës dhe Erion Veliajt për kontrollin e Bashkisë së Tiranës, duke e cilësuar si një luftë të hapur mes dy klaneve mafioze brenda Partisë Socialiste. “Edi Rama është kryetari i një organizate të rrezikshme kriminale për qenien e shqiptarëve”, tha ai, duke e konsideruar kryeministrin si kreun e një strukture mafioze që po shkatërron vendin.
Berisha nuk i kurseu sulmet as ndaj Veliajt, duke thënë se ai është një hajdut i provuar dhe meriton ndëshkim, por qw nuk wshtw dwnuar pwr aferat e pwrbashkwta me Edi Ramwn. “Veliaj meriton të dënohet për 1 milion pemë që ka mashtruar dhe ka vjedhur paratë e fidanëve dhe nuk i ka mbjellë. Ai meriton të dënohet për inceneratorin e Tiranës, 130 milionë euro që nuk ekziston. Ai meriton të dënohet për 5D, se ata prishin si barbarë shtëpitë e qytetarëve dhe nuk i kompensojnë”.
Por sipas Berishës, Veliaj po ndëshkohet për çështje të tjera, ndërsa për aferat e mëdha ku ka qenë bashkë me Ramën, drejtësia po hesht. “Veliaj dënohet për ato gjëra që nuk i ka bërë vetëm me Ramën. Dhe ato që i ka bërë me urdhër të Ramës, nuk dënohet. Nuk dënohet për inceneratorin, nuk dënohet për 5D, për hotelin, se u tha që është Olsi Rama aksioner”.
Në lidhje me situatën në Bashkinë e Tiranës, Berisha e përshkruan atë si një përplasje brutale për pushtet mes dy grupeve kriminale: “Betejë mafiozësh. Njëri shkon dhe emëron Anuela Ristanin, Veliaj e shkarkon dhe emëron një tjetër. Rama shkon dhe emëron një Sekretare të Përgjithshme tjetër. Ky i thotë Policisë Bashkiake ndaloje hyrjen nga burgu. E merrni vesh se ku është Tirana dhe Bashkia? Në duart e çfarë mafieje të rrezikshme është?”
Në analizën e tij, ai e krahason situatën me një skenar kriminal që vetëm sa ka nisur: “Kjo është vetëm pjesa e parë e filmit Narcos. Ta keni të qartë që keni parë vetëm serinë e parë të atij filmi. Se çfarë do të shohim në seritë e tjera, do çuditeni ju dhe bota”.
