Dy komisionet hetimore, ai për koncesionet në Shëndetësi dhe për sistemin TIMS, do të mblidhen sot në Kryesinë e Kuvendit.
Komisioni hetimor për koncesionet në Shëndetësi, sterilizimin dhe check up, mblidhet në orën 10:00 dhe zhvillon mbledhjen e dytë. Në këtë mbledhjen pritet të caktohen ekspertët dhe institucionet që do t’i drejtohen për informacion. Opozita ka thirrur rreth 16 dëshmitarë, mes të cilëve janë kryeministri Rama e ish-ministrat e shëndetësisë Beqja e Manastirliu.
Ndërkohë, komisioni hetimor për rrjedhjen e të dhënave nga sistemi ‘TIMS’ do të konstituohet sot në orën 15:00. Ky komision do drejtohet nga deputeti demokrat Ervin Salinaji, ndërsa nënkryetar është Toni Gogu nga PS. Në mbledhjen e parë do të deklarohet qëllimi i ngritjes së komisionit dhe do të miratohet një plan i qartë pune.
